Racontes de viatge : Orgeval-Macon


Adishatz,

Vos desiram a tots una bona annada 2018, ensolelhada, plena d’energia e de novèls projèctes! Grandmercejam los que nos encoratjan e nos sostenon dins la realizacion d’aqueste projècte, aquò nos pòrta en aquestes temps de fred. 🙂


Una classa d’Orgeval que seguís nòstre periple.

Dempuèi las darrièras novèlas, profitèrem d’una pausa a Orgeval per encontrar mantunas classas e tornèrem préner la rota en direccion de Chartres amb un equipament renovelat per afrontar l’ivèrn.



Animacions dins las classas de l’escòla Pasteur d’Orgeval.

Lo solelh que se colca entre 5 e 6 oras cambia los encontres que fasèm sus la rota. Lo freg mai present sembla absorbir una partida de la calor umana, sens comptar lo monde que nos pren per de fòls que demesís pas. ^^ E tre que lo solelh se colca mai d’ora que l’orari mejan de sortida del trabalh, aquò far una reduccion e una seleccion del monde que podem encontrar! Nos cal anticipar mai nòstras pausas per cada nuèit, a trucas de dormir jos la tenda dins de condicions mai dificilas qu’en estiu… mas aquò se fa. Amb un veïcul solar son tots aqueles pichons detalhs que fan la diferencia! Nòstras baterias se cargan mens viste e ensajam de compensar en sollicitant mai nòstres muscles que son entraïnats ara.



Un tròç de camin sus la Loire en velò plan acompanhats 🙂

Profitam de las polidas jornadas per avançar fòrça d’un còp (80-110 qm) perque al contrari, las marridas jornadas son vertadièrament redibitòrias per la produccion d’energia e preferissèm nos aturar mai sovent (20 qm per la jornada la mai pichona). Aquò cambia tot e modifica nòstre rapòrt als autres : los encontres son mai escasses mas son tanben mai inacostumats e prigonds! Una pensada especiala de cap a Marlène e Julien que nos aculhiguèron una setmana per esperar una melhora meteo e descobriguèrem en çò d’els un pichon recès en construccion, gaireben un autra pagèla talament lo temps sembla i passar a un autre ritme.




D’esquèrra a dreita : un forn a teulas, un jardin de Nadal fach a la man, l’ostal de la Beauce e una decoracion pintrada.

Ensajam çaquelà de contunhar a préner lo temps d’avançar de còps a l’azard de las rotas e i descobrissèm polidas causas, de luòcs que sospeitàvem pas l’existéncia… Nos mainam de la quantitat de causas a costat de las qualas on pòt passar se prenèm pas lo temps d’agachar a l’entorn de se : un luòc associatiu per la cultura e l’educacion, un jardin decorat per un apassionat que bastís sus decòrs d’esper el per que cadun pòsca lo visitar a gràtis, etc. Al campestre mai qu’en vila, lo rapòrt al temps dicta e organiza lo quotidian de cadun, de biaisses plan divèrses de segur. Bastir d’esper el son ostal, acompanhar los dròlles dins un aprentissatge autonòm, se desconnectar dels mails e dels rets socials sus internet, … tant de presas de posicion que sovent exprimisson una volontat de tornar trobar la mestresa de son ritme de vida e de l’adaptar pel melhor a sa convenéncia.



Pausa per sarrar lo bostièr del pedalièr de darrièr… a costat d’un lama 😀

Lo monde que parla de nòstre projècte menèt encara sa part de suspresas pendent aquelas darrièras setmanas de periple, de la pichona anecdòta al cambiament de programa! Es aital que trobèrem un drollet que coneissiam pas gaire a Nevers que nos contèt que sa professora lor mostrèt una fòto de nòstre tandèm en classa. La professora en question èra de fach nòstra òsta del ser e quitament se poguèrem pas anar dins sa classa, anèrem dins l’escòla de son filh. 🙂



Session fòto e maquilhatge en çò de França 3 abans de rodar l’emission.

Es aital tanben que foguèrem contactats per una emission regionala de França 3 Centre-Val de Loire a Orléans e que torcèrem nòstre trajècte per y anar. Nòstra primièra emission de television foguèt una experiéncia pro diferenta de çò que faguèrem fins ara. Tot i es cronometrat, cada rubrica a un temps acordat precís e lo cal pas despassar! Subretot per una emission en dirècte, jos pena de dever copar d’autras rubricas. Tant digam que foguèt pro frustrant de dever respondre per tant pauc de temps e de pas poder aprigondir tot çò que voliam per poder explicar corrèctament los diferents aspèctes de nòstre projècte, mas aquò’s lo jòc e es tanben un exercici necessari e interessant pel trabalh de concision que demanda.


Qualquas reparacions en esperant que la meteo se melhora : 2 soudaduras que prenguèrem pas lo temps d’afortir sufisentament finiguèron que petèron, çò que fragilizava l’estructura del tech.



Es aital qu’aquesta primièra fasa exploratòria de 2500 qm en França nos menèt fin finala dusca a Mâcon a la fin del mes de decembre, just coma cal per las fèstas de fin d’annada! Alavetz, quina analisi far d’aquestes primièrs meses de periple ?

Un bilanç global plan positiu : lo contentament de complir nòstres objectius d’autonomia energetica e de foncionament del prototipe, contra totas las constrentas. Èsser a energia positiva implica d’adaptar nòstre ritme a nòstra capacitat de produccion d’energia e aquò implica tanben de sacrificis per moments. Mas capitèrem plan a cambiar aquelas constrentas en oportunitats per préner lo temps de far d’encontres.



Animacions dins las classas de l’escòla de Paray-le-Monial

De contentament tanben de cap als encontres e a las animacions efectuadas, qu’an ja plan mudat dempuèi la debuta. Çaquelà la possibilitat de progressar es encara consequenta e nòstre caminament es luènh d’èsser evident. Se nòstre mejan de transpòrt complís son ròtle en atirant l’atencion e las discutidas, demòra de còps complicat d’aprigondir aquelas discutidas tant coma lo volriam. Las tematicas que nos interèssan dins aqueste projècte son complèxas e los enjòcs que s’amagan darrièr encara mai. S’adaptar a la sensibilitat de cadun de cap a aquestas tematicas e a lors reflexions sus aquestes subjèctes pòt èsser complicat se an pas enveja de los explorar. Mas nòstre projècte amb sos axes multiples presenta totjorn un subjècte d’escambi e de partatge que n’en mena d’autres. 🙂

Contunham a cercar los mejans d’implicar un maximum de monde dins nòstre caminament, d’entrar en relacion amb un public mai gran e pas necessariament convencut, e de melhorar l’impacte global de nòstre projècte per far avançar las reflexions sus aquestes enjòcs complèxes que nos influencian tots!


Se volètz veire una retrospectiva de nòstre projècte pendent l’annada 2017, podètz agachar la vidèo çai-jos realizada amb l’ajuda de nòstre partenari Faltazi Prod que grandmercejam! Bon visionatge 🙂

Per preservar nòstra implicacion dins nòstras intervencions e lo dret a l’imatge dels escolans, avèm pauc de fòtos e vidèos de las animacions. Esperam qu’aquò vos balhara çaquelà un bon còp d’uèlh de las activitats realizadas dins l’encastre de nòstre projècte!

 

A lèu!

 

La còla SolaR’hythm