Racontes de viatge : Vannes-Orgeval


Adishatz,

Dempuèi lo darrièr còp ont èrem arrestats en Bretanha, avèm contunhat dincas a Orgeval prèp de Paris.


Arribada sus la còsta de la mar Manche prèp de Saint-Brieuc (a esquèrra) e passatge de la coa de l’auragan Ophelia sus la Bretanha que faguèt un cèl jaune escuresit (a dreita)

Crosèrem la Bretanha pel centre dincas a la còsta nòrd prèp de Saint-Brieuc. Tre la debuta notèrem qu’aprèp qualquas setmanas de pausa, lo solelh se colcava mai d’ora e èra mens naut dins lo cèl doncas produsissiam mens d’energia cada jorn. Alavetz nos calguèt trapar un autre ritme per pas acabar las baterias. Es vertat que nos balhèrem un objectiu per arribar a Nantes dempuèi Agen per poder veire l’Energy Observer (cf Racontes de viatge : Agen-Vannes), mas ara podèm alentir un pauc per trapar un ritme que nos conven melhor.



Bordegèrem la còsta amb lo Mont Saint-Michel en reireplan pendent nombroses quilomètres, èra subrebèl !

Causiguèrem un novèl limit de 60-70qm/jorn en plaça de 100qm/jorn pendent lo viatge d’Agen a Nantes. Aquò vos sembla benlèu pauc en comparason a la veitura, mas aquela diferéncia cambièt plan nòstra percepcion del camin ! Nos avisèrem al cors de la primièra partida d’aqueste torn de França que de se balhar d’objectius de distància per cada jorn èra pas compatible amb nòstra vision del viatge en velò e encara mens compatible amb los objectius del nòstre projècte : préner lo temps d’encontrar lo monde, de charrar, de respondre a las sollicitacions e las oportunitats que se presentan, etc. En dus mots, de far cada moment d’aqueste periple util e interessant, aquò rai lo temps que durarà. Novèls objectius, novèl ritme, novèl rapòrt al temps, almens al temps qu’acordam al viatge e als autres. Sabèm mai o mens ont anèm mas sabèm pas quora i arribaram ni qual serà lo camin!



Nòstre itinerari muda ara per ara e aquò nos mena a rencontrar de personas plan diferentas, partejam amb elas istòrias e aventuras mas tanben visions del monde plan divèrsas. De còps que i a plantam la tenda mas rarament al final e lo mai sovent es per la botar dins lo jardin de qualqu’un aprèp aver discutit amb el. Mantunas personas nos aculhiguèron amb generositat a lor ostal per una nuèit e quitament per partejar un repais. Les grandmercejam encara e mercejam tanben los que nos invitèron e ont poguèrem pas anar !




Nos remembrarem tot particularament de nòstre encontre amb Jean-Claude e Jeannine que nos permetèron de reparar nòstra ròda crebada dins lor garatge al recès de la pluèja puèi nos invitèron a sopar e dormir dins lor ostal, foguèt una serada meravilhosa 🙂




Los camins que bordejan la còsta Bretona puèi Normanda nos ofriguèron de paisatges subrebèls que nos faguèron lèu oblidar las dificultats del desnivèl e de la pluèja, mentre que las polidas rencontres nos permetèron de profitar de las pausas que la manca de solelh nos impausa de còps, amb de polidas discutidas e d’oportunitats de far d’animacions dins d’escòlas o dins de Salons que crosam.


Passatge dins una escòla en Bretanha (a esquèrra) e al salon de l’Abitat e del Desvolopament Durable de Bolbec (a dreita)


Mercé a Stephane per l’escòrta ! 🙂

En gerissent corrèctament nòstra consomacion d’energia e nòstre ritme, poguèrem arribar sens cap d’empacha al pont de Normandia que traversèrem en tota seguretat mercés a una veitura de servici que nos escortèt, puèi a Rouen e enfin a Orgeval ont sèm arrestats dempuèi qualques jorns. E tot aquò en autonomia complèta, sens jamai cargar nòstras baterias sul sector (e òc, sètz encara fòrça a nos pausar la question mas n’avèm pas portat lo cargador per brancar nòstras baterias sul sector 😉 ).




La diferencia entre la calma del campestre e dels vilatges e lo boliment de las vilas es tant mai notable a velò. Se sent a diferents nivèls : sus la rota amb la pression mai o mens fòrta dels automobilistas, mas sustot dins la disponibilitat e la curiositat del monde, lor obertura als autres e la prigondor dels encontres que se pòdon far a l’azard dels camins. Nos triga de descovrir d’autras regions e d’autres environaments!




Albièra lo matin, aprèp una bona pujada sèm passats al dessús de la bruma qu’embrumava tota la valada de Seine…

Anèm ara tornar préner la rota cap a Chartres puèi cap a Mâcon e Lyon en passant per Orléans. De segur, l’avetz compres, nòstre trajècte previsional cambiarà lèu al gost dels encontres alavetz se voletz que passam vos veire, esitetz pas a nos contactar 🙂 Nos arrestam pauc dins las grandas vilas ont es malaisit de circular amb nòstre tandèm, mas podèm i passar dins la jornada.

N’en profitam per vos dire qu’avèm apondut un ligam “Ont sèm?” dins lo menut, coma lo vesètz sus la fòto. Vos menarà a la pagina RouteYou de nòstre itinerari en França que metrem a jorn tan sovent que possible. E per legir las darrièras novèlas, podètz tanben anar dins la partida “Réactions” situada sus la dreita 😉

A lèu !

 

La còla SolaR’hythm