Racontes de viatge : Agen-Vannes


N’i a de causas que se son passadas dempuèi nòstra partença !


Partiguèrem lo 3 de setembre 2017 davant lo Café Vélo d’Agen, un gran mercés als coratjós que se levèron per nos encoratjar! Una polida jornada, las baterias plenas e enmai de ciclistas que volián nos acompanhar suls primièrs quilomètres…tan d’energias unidas per començar aqueste periple! 🙂 Sentiguèrem çaquelà la lassièra dels darrièrs jorns de preparacion, que caliá ésser prèstes per se n’anar! Grandmercejam los amics que nos recebèron fòrça plan aqueste primièr jorn e que nos ajudèron a nos pausar per contuhnar d’avançar.


Passèrem lo 4 de setembre a Vilanèva d’Òlt per encontrar l’Espace Info Energie qu’es un sosten pedagogic sus la tematica de l’energia per nosautres. Foguèt l’escasença de lor mostrar nòstre tandèm e d’explicar cossí fonciona perque l’avián pas encara vist. Lo mond que passava pr’aquí s’arrestava tanben per curiositat e passèrem un brave moment a parlar d’energia, de mejans de transpòrt, d’autonomia e de ritme de vida…:)

Puèi anèrem cap a Dordonha ont d’amics nos esperavan. Mas a la sortida de Vilanèva d’Òlt, una veitura nos atrapèt : de mond que voliá tanben discutir amb nosautres, veire de mai prèp lo tandèm e compréner çò que fasèm.

Pauc de temps aprèp, la cadena de darrièr desralhèt e comprenguèrem qu’aviam perdut una escrova (a còp segur era pas pro sarrada). I botèrem un tròç de ficèla e demandèrem a un garatge sus la rota de nos despanar e aqueste còp la sarrèrem plan.



La Dordonha, coma lo sabètz benlèu puja fòrça! Mas lo solelh es aquí e sem plan contents de profeitar de polits paisatges (passèrem davant lo castel de Biron) e d’encontres plan agraduis! Totjorn fòrça questions sul nòstre projècte, sul velò e de reflexions sus l’avenidor de las nòstras sorgas d’energia… mercé a totas e a totes per lo vòstre acuèlh. 🙂


Dimècres 6, nos encaminèrem per Nantes! L’idèia era d’anar al davant de la còla de l’Energy Observer, un batèu plan modern qu’avança mercés a mantunas energias renovelables (solara, eoliana, idroliana e idrogèn) e que fasiá una pausa a Nantes alentorn del 10 de setembre. Nos caliá doncas avançar plan per arribar a Nantes en una setmana. Alavetz, pedalèrem mai de 100 quilomètres mantunas jornadas amb enmai un desnivèl pro fòrt e un marrit temps… Deguèrem çaquelà adaptar nòstre ritme e nòstra vitessa a la nòstra capacitat a produsir d’energia, e prenguèrem un pauc mai de temps per avançar.



De tot biais, es totjorn un plasèr de s’aturar per contentar la curiositat del mond que pren lo temps de s’arrestar : “Son de panels solars? I a pas besonh de pedalar alavetz!?” (E si, cal pedalar!) “Cossí fonciona? Es un prototipe? D’ont venetz? Ont anatz?” I a totjorn una bona escasença per enregar una convèrsa e nos encoratge d’encontrar d’autres que son sensibles a las problematicas que nos interèssan.

Passam mai que mai per pichons camins, per pistas ciclablas quora es possible mas de còps lo GPS nos mena fins a camins de tèrra. Ensajèrem un còp d’i anar mas era tròp fangós…quina cagada! Lo tandèm era tròp pesuc per passar, la fanga se botèt dins lo parafanga que se desgafèt e que faguèt dins un res de temps un torn amb la ròda. Urosament era pas copat e lo bel temps nos daissèt lo petaçar tranquillament a la rasa del camin.



Fin finala arribèrem a Nantes lo 11 de setembre aprèp 560 quilomètres dempuèi Agen, prèstes per veire l’Energy Observer. La còla del batèu foguèt plan interessada pel nòstre tandèm qu’utiliza l’energia solara e mai que mai nòstra energia pròpria per avançar. Nos recebèron fòrça plan e nos faguèron quitament visitar lor batèu per nos explicar cossí fonciona. Eles utilizan mantunas energias renovelables per èsser mens dependent de la meteo : i a un fum de panels solars dessus (concebuts a partir de doas tecnologias diferentas), i a tanben doas eolianas verticalas e i aurà una vela de kite. Dins la còca del batèu i a 2 bèlas baterias e 2 botelhas per gardar l’idrogèn : son de resèrvas d’energia. Un vertadièr batèu del futur! Foguèt un polit encontre amb aquesta còla plan motivada per far cambiar las causas e los nòstres biaisses de produsir d’energia.




Contunhèrem fins a Saint Nazaire e passèrem una jornada estranha. Lo matin pedalèrem pel campèstre e lo palun de Brièra, dins un ambient plan seren. Lo vèspre bordejèrem la rafinaria de Donges tot de long, era pas tròp agradiu d’èsser al mitat d’un siti tan industrial, mas nos remembra que lo mond a plan besonh d’energia. Fin finala, arribèrem a Vannes en Bretanha lo 13 de setembre aprèp una jornada de las mai plojosas! Mas lo solelh tornèt lo lendeman per cargar nòstras baterias e aquò marcha plan. Capitèrem a avançar a energia positiva sul primièr tròç de camin!

Bilanç tecnic del velò : los sètis son plan confortables e lo tech nos apara plan del solelh e de la pluèja, lo pneu de davant a l’esquèrra completament usat pr’amor d’un frenatge desequilibrat enmai del pes del tandèm, qualques desralhaments pas tròp maissants, un viravent que fa plan son trabalh quitament se fa un pauc tròp de bruch, pro d’energia produsida per avançar e cargar tots los aparelhs utils (telefòns, gps, lutz, etc.)… e los ciclistas aguèron qualquas corbaduras a la debuta mas era pas grand causa, aquò rotla!

Mercejam tot lo mond que nos aculhiguèt a braç alargats pendent lo viatge, foguèt un vertadièr plaser de discutir amb vosautres, mercejam los que nos saludan en camin o que s’aturan per charrar, los que nos mandan messatges, los que nos acompanhan de prèp o de luènh…plan mercé a vosautres per vòstres encoratjaments!

 

A lèu,

La còla SolaR’hythm